Қарағандыда оқушы қызды зорлап, жүкті қылған бұрынғы имам қамауға алынды

Қарағанды облысында ауыл мешітінің бұрынғы имамы кәмелет жасына толмаған қызға сексуалды сипаттағы зорлық көрсеткен, салдарынан қыз жүкті болып, оған жасанды түсік жасалған. Ал оның ата-анасы бұл жағдайды біле тұра полицияға хабарламаған.

Қыздың молдадан жүкті болып, оған түсік жасалғаны туралы полицияға алғаш болып қарағандылық белсенді Айсұлтан Жақыпов хабарлаған. Бұл ақпаратты әлеуметтік желіде жазған да – Жақыповтың өзі.

Ол 25 қаңтарда өзінің Facebook парақшасында Қарағанды облысындағы ауылдардың бірінде "кәмелет жасына толмаған қыз ауыл имамынан жүкті болғанын" және қызға аборт жасалғанын", "ата-анасы бұл оқиғаны жасырғандықтан, полицияға өзі арыз түсіргенін" жазды. Бірақ ол заңға сай, тергеу аяқталғанша бұл оқиғаға қатысты басқа ақпаратты жариялай алмайтынын жеткізді.

"Күдікті ұсталып, қамауға алынды"

ORDA. тілшісі осы оқиғаның анық-қанығын білу мақсатында Қарағанды облыстық полиция департаментіне ресми сауал жолдады. Департамент ақпаратты растап, оқиға қатысы бар деген күдікпен облыстың 40 жастағы тұрғыны қамауға алынғанын хабарлады.

Полицияның ORDA. редакциясына жіберген ресми жауабына қарағанда, блогер Айсұлтан Жақыпов жоғарыда аталған оқиғаны 2020 жылдың 31 желтоқсанында хабарлаған.

"Сол күні аталған хабарламаға байланысты Қылмыстық кодекстің 120-бабы ("Зорлау") 4-тармағына сай қылмыстық іс тіркелді. Оқиға қатысы бар деген күдікпен облыстың 40 жастағы тұрғыны ұсталды. Ол сот санкциясымен қамауға алынды. Қазір оқиға қатысы бар өзге де адамдар толық анықталды" делінген департамент хабарламасында.

Полиция ORDA. тілшісіне оқиға қатысы бар өзге адамдардың кім екенін айтпады. "Қылмыстық-процестік кодекстің 201-бабына сай, өзге ақпарат тергеу аяқталғанша жарияланбайды" деп мәлімдеді.

Заңда зорлаушыға қандай жаза бар?

Кәмелет жасына толмағандардың сексуалды зорлық-зомбылыққа ұшырауы – Қазақстан қоғамында жиі резонанс туғызатын оқиғалардың бірі. Infopublic.pravstat.kz сайтындағы дерек бойынша, елде 2020 жылдың алғашқы алты айында кәмелетке толмағандарға сексуалды зорлық жасағаны үшін 197 адам сотталған. Ал 2015 жылдан бері есептегенде 1868 адам қылмыстық жауапкершілікке тартылған. 

Қоғамда кәмелет жасына толмағандарға жыныстық зорлық жасағандарды педофил деп атайды. Қазақстан заңдарында "педофилия" деген сөз жоқ. Дегенмен кәмелет жасына толмағандарға сексуалды зорлық жасағандар Қылмыстық кодекстің "Зорлау", "Сексуалдық сипаттағы зорлық-зомбылық әрекеттері", "Он алты жасқа толмаған адаммен жыныстық қатынас немесе сексуалдық сипаттағы өзге де әрекеттер жасау" және тағы да басқа бабы бойынша жазаланады. 

2019 жылдың соңында Қазақстан президенті Қасым-Жомарт Тоқаев зорлау қылмысын жасағандарға жазаны күшейту туралы заңға қол қойған. Соған сәйкес, кәмелет жасына толмаған балаларға қарсы жасалған сексуалды сипаттағы іс-әрекет аса ауыр қылмыс түріне жатқызылып, қылмысы дәлелденген адамға 20 жыл немесе өмір бойы бостандығынан айыру жазасы енгізілді. 

Бұдан бөлек, елде 2018 жылдың қаңтарынан бастап химиялық кастрация жасау туралы заң күшіне енген.​ Қылмыстық кодекске сәйкес, химиялық кастрация "кәмелетке толмағандарды зорлады" деген айып тағылып, қылмысы дәлелденген 18 жастан асқан адамдарға қолданылады.

2019 жылғы желтоқсанда Қазақстан ішкі істер министрлігі Қылмыстық-атқару жүйесі комитеті елде "Зорлау" бабымен сотталған төрт азаматқа химиялық кастрация қолдану үкімі орындалып жатқанын хабарлаған. Олардың мәліметінше, процедура жарты жыл уақыт алады. Бұдан бөлек, 2019 жылдың шілдесінде де "Зорлау" бабы бойынша сотталған бір адамға химиялық кастрация үкімі кесілген.