Қарағандыда өндірілген вакцина ресми тіркеуін аяқтады

Қарағанды фармацевтикалық кешені Қазақстан Республикасының аумағында «Гам-КОВИД-Вак» вакцинасын тіркеу рәсімін аяқтады, деп хабарлайды ORDA. Қарағанды фармацевтикалық кешенінің баспасөз қызметіне сілтеме жасап.

Фармацевтикалық кешеннің хабарлауынша, ҚР Денсаулық сақтау министрлігінің Сараптама ұйымы 13 ақпанда вакцинаның қауіпсіздігі, сапасы мен тиімділігі туралы қорытынды берген.

Аталған қорытынды негізінде ҚР ДСМ Медициналық және фармацевтикалық бақылау комитетіне тіркеу куәлігін алуға өтінім жолданды. Осылайша, Қазақстан «Спутник-V» вакцинасын қолдануды мақұлдаған 27-ші мемлекет болды. Бүгінгі күні вакцина Ресей, Беларусь, Аргентина, Боливия, Сербия, Алжир, Палестина, Венесуэла, Парагвай, Түрікменстан, Мажарстан, БАӘ, Иран, Гвинея Республикасы, Тунис, Армения, Мексика, Никарагуа, Серб Республикасы (Босния және Герцеговина энтитеті), Ливан, Мьянма, Пәкістан, Моңғолия және Бахрейн сияқты мемлекеттерде тіркелген.

Ақпан айының соңына дейін еліміздің барлық өңірлеріне ҚФК өндірген 90 мыңға жуық «Спутник - V» вакцинасын жеткізу жоспарланып отыр.