Қарағандыда 500 адамға той жасаған шенеунік жазаланады

Елімізде тез таралатын індеттің өршіп тұрғанына қарамай, Қарағанды облысы жер қатынастары басқармасының басшысы Қалел Мақсұтов мейрамханалардың бірінде 500 адамға той жасаған.

Ақпарат әлеуметтік желілерде тарап кетіп, шенеуніктің басы дауға қалды. Қарағанды облысы әкімдігі бұл фактіні растады, шенеуніктің іске қатысты  жазаланатынын да  атап өтті.

— Мемлекеттік қызметкерге қатысты арнайы тексеріс тағайындалады, карантиндік шектеулерді бұзу фактісі расталған жағдайда қызметінен босатуға дейін, ең қатаң шаралар қабылданады, - деді өңір әкімінің баспасөз хатшысы Марина Шаповалова.

Оған қоса облыс  әкімінің баспасөз хатшысы салтанатты шара санитарлық нормалардың бұзылуына байланысты тоқтатылғанын, ұйымдастырушыларға әкімшілік айыппұл салынатынын жеткізді.

— Барлық азаматқа індеттің өршуіне байланысты санитарлық талаптарды сақтау қажет екенін ескертеміз. Жауапты мемлекеттік органдар мәртебесіне немесе жұмыс орнына қарамастан, заңбұзушылықтардың жолын кесу үшін қатаң шаралар қабылдайды, - деді баспасөз хатшысы.