Қарақалпақстандағы наразылық: Мирзиёев Конституцияға енгізілген түзетулерден бас тартуды ұсынды

Қарақалпақстан көшелеріндегі митингілерден кейін Өзбекстан президенті Шавкат Мирзиёев облыс орталығы Нүкіс қаласына келді. Ол Жоғарғы Кеңес депутаттарымен өткен жиында заңның Қарақалпақстанның құқықтық мәртебесіне қатысты баптарын өзгеріссіз қалдыруды ұсынды, деп хабарлайды Orda.kz тілшісі.

1 шілдеде Өзбекстан Конституциясына Қарақалпақстанды өз тағдырын таңдау мүмкіндігінен айыратын түзетулер енгізіледі деген хабардан кейін  автономияда толқулар басталды. 2 шілде күні де толқулар жалғасты.

Қала тұрғындарының айтуыншағ Нүкісте интернет өшірілген. Түс ауа орталық базарға халық жиналды. Полициямен қақтығыс болды. Тас лақтырылып, оқ пен жеңіл гранаталардың дыбыстары естілді.

Дәл осы кезде басқа қалаларда да адамдар көшеге шығып жатыр деген хабарлар шыға бастады. Көпшілігі Нүкіске баруды ұйғарғанымен, жол кедергілеріне тап болды.

Кеше  толқуларға қарамастан Өзбекстан президенті  Нүкіске барды деген бейресми ақпарат пайда болды. Кешке қарай ғана бұл ақпарат расталды. Өзбекстан басшысының баспасөз хатшысы Шерзод Асадовтың Telegram-каналында Мирзиёевтің Жоғарғы Кеңес депутаттарымен, аға буын өкілдерімен және Қарақалпақстан белсенділерімен кездесуі туралы жазба пайда болды.

— Жобада Қарақалпақстан Республикасының өзіндік  этникалық-мәдениет ерекшеліктеріне, ұлттық салт-дәстүрлері мен құндылықтарына, оның ерекше құқықтық мәртебесіне назар аударып, Қарақалпақстан Республикасының құқықтық статусы туралы нормаларды өзгеріссіз қалдыру қажет деп есептеймін. Атап айтқанда, Конституцияның 70, 71, 72, 74, 75-баптары өзгеріссіз қалдырылды, — деді Шавкат Мирзиёев.