Қарақалпақстанда төтенше жағдай жарияланды

Шавкат Мирзиёев республика аумағында 3 шілде мен 2 тамыз аралығында төтенше жағдай жариялады, деп хабарлайды Orda.kz тілшісі Өзбекстан президентінің баспасөз қызметіне сілтеме жасап.

«Президент Жарлығымен азаматтардың қауіпсіздігін қамтамасыз ету, олардың құқықтары мен бостандықтарын қорғау, құқықтық тәртіпті қалпына келтіру мақсатында Қарақалпақстан Республикасы аумағында сағат 00:01-ден бастап төтенше жағдай режимі енгізілді. 2022 жылғы 3 шілдеден 2 тамыз 00:00-ге дейін» делінген хабарламада.

Ал осы уақытта алаңға шыққан адамдарға қарсы қару мен жеңіл дыбысты гранаталар қолданылғаны хабарланды.

Таралып жатқан  бейнежазбалар мен фотосуреттерге қарағанда, көптеген адам зардап шеккен. Алаңда жарылған снарядтардың қаптамалары әр жерде шашылып жатыр.  Кейбір деректерде 20 адам қаза тапқаны  айтылады. Бірақ бұл туралы нақты расталған ақпарат жоқ.

Төтенше жағдай кезінде барлық бұқаралық іс-шараларға тыйым салынып, сағат 21:00-ден 07:00-ге дейін коменданттық сағат енгізілетіні хабарланды. Республика аумағына кіру мен шығуға шектеу қойылған.