Арқалық фабрикасының жұмысы жанданды

Арқалық қаласында жұмысы тұралап қалған «Агроинтерқұс» ЖШС жұмысын қайта жандандырды, деп хабарлайды ORDA тілшісі.

Арқалық қаласындағы кәсіпорын «Агроинтерқұс» ЖШС құс тұмауы тарағандықтан жұмысын уақытша тоқтатқан болатын. Кәсіпкерліктің қызметі қайта қалпына келгенге дейін кемі бір жыл қажет болған.

Облыс әкімінің айтуынша, Арқалық құс фабрикасының қызметі қайта жанданды.

«Құс тұмауына қарсы ветеринариялық жою іс-шаралары уақтылы жүргізілді. Фабрикаға жаңадан балапандар әкелінді. Жақын арада дүкендерде Арқалықтың сапалы және қолжетімді жұмыртқасы пайда болады. Бұған уәде етемін. Жалпы құс фабрикасын жаңғырту және мал шаруашылығы кешенін салу бойынша АӨК саласында 2 жобаны қолға алып отырмыз. Қостанай ауданында қуаты жылына 2 мың тоннаға дейін бройлер етін өндіретін агроөнеркәсіптік кешен іске қосылды», - деді Архимед Мұхамбетов халыққа есеп беру кездесуінде.

1970 жылдан бері жұмыс істеп келе жатқан Арқалықтағы құс фабрикасы 1992 жылы тоқтатылып, 2008 жылы қайта ашылды. Кәсіпорнында 220 адамға жұмыс істеп, жылына 120 млн дана жұмыртқа өндіріп, нарыққа шығарып келеді.