Ақтөбеде екі бала өрттен қаза тапты

21 сәуірде Ақтөбеде жеке үйлердің бірінде өрт шығып, кәмелетке толмаған екі бала қаза тапты.

Ақтөбе облысының Төтенше жағдайлар департаментінің мәліметінше, жеке тұрғын үйдің ас үйі, дәлізі, одан кейін шатыры өртенген.

Төтенше оқиға орнынан кәмелетке толмаған екі баланың, 10 жасар ұл мен 4 жасар қыздың мәйіті табылды. 1954 жылы туған әйел жансақтау бөліміне жатқызылды.

«21 сәуір күні сағат 4.08-де 112 пультіне Ақтөбе қаласы, Алматы ауданы, Жангелдин көшесінің бойындағы жеке тұрғын үйде өрт шыққаны туралы хабарлама келіп түсті. Өртті сөндіруге жеке құрамнан 16 адам мен үш техника жұмылдырылды. Қоңырау шалған жерге жеткенде жеке тұрғын үйдің ас үйі мен кіреберісі, шатырға өтпелі тұстан өрт шыққаны анықталды. Өрт орнынан екі баланың мәйіті табылды. 1954 жылы туған әйел жансақтау бөлімінде жатыр» деп хабарлады Ақтөбе облысы Төтенше жағдайлар департаментінің баспасөз қызметі.

Үйде әйел мен екі баладан басқа тағы екі ересек адам болған. Өрт 4:41-де оқшауланып, 4:49-да толығымен сөндірілді.