Ақтөбеде биыл сайланған 40 жастағы депутат қамауға алынды

Қобда аудандық мәслихатының депутаты Асылбек Нұргелдинге мемлекеттен 457 млн теңгені заңсыз иеленді деген айып тағылды.

Ақтөбе облысында жоқ малға заңсыз субсидия алған Асылбек Нұргелдин биыл депутат атанған. Қылмыстық іске қатысты Қаржылық мониторинг агенттігінің облыстық департаменті тергеу жүргізіп жатыр. Депутаттың 5 мамыр күні қамауға алынғаны белгілі болды.

«Ақтөбе қаласының мамандандырылған тергеу сотының 2023 жылдың 5 мамырындағы қаулысымен Қылмыстық Кодекстің 190 бабы 4-бөлігі 2-тармағында көзделген, яғни, аса ірі мөлшерде алаяқтық жасады деп күдіктелген азаматқа қатысты күзетпен ұстау түріндегі бұлтартпау шарасын санкциялау туралы тергеу органдарының өтініш хаты қанағаттандырылды» деп хабарлайды Ақтөбе облыстық сотының баспасөз қызметі.

Депутатқа қатысты күзетпен ұстау түріндегі бұлтартпау шарасы 3 шілдеге дейін санкцияланған.

Белгілі болғандай, ол жоқ малға «Сыбаға» мемлекеттік бағдарламасы бойынша субсидия алған. 600 ірі қара малға есептелген субсидия көлемі 457 млн теңге болды.

«Қобда аудандық мәслихатының депутаты Асылбек Нұргелдин Қобда селосы №4 сайлау учаскесінен сайланды. Қазір анықтау жұмыстары жүріп жатыр. Сот шешімін күтеміз, соған байланысты шешім қабылданады. Биыл 19 наурызда сайланған депутат» деді облыстық сайлау комиссиясының төрағасы Нұрлыбек Жүсіпов.

Автор: Ардақ Ерубаева