Ақтөбеде анасы мен баласын өлтірген қылмыскер ұсталды

Полицейлер Ақтөбедегі көпқабатты үйдің пәтерлерінің біріндегі қос кісі өлімінің бетін ашты, онда ғажайып түрде марқұмның 13 жасар қызы ғана аман қалды.

«Қазақстан Республикасы Ішкі істер министрлігі криминалдық полиция департаментінің үйлестіруімен тергеушілер мен жедел уәкілдердің қажырлы жұмысының нәтижесінде тәртіп сақшылары қысқа мерзімде бұл қылмыстың, атап айтқанда, қарақшылық шабуылдың бетін ашты», - делінген Ақтөбе облысы полиция департаментінің баспасөз қызметі таратқан хабарламада.

Осы қылмысты жасады деген күдікпен Ақтөбе қаласының 1999 жылы туған тұрғыны ұсталып, ол кінәсін мойындап, қамауға алынды. Тергеу жалғасып жатыр.

Еске салайық, 29 наурызда Ақтөбедегі көпқабатты үйдегі пәтерлердің бірінде әйел мен оның кәмелетке толмаған ұлының мәйіті табылып, оның 13 жасар қызы ауыр жарақатпен жансақтау бөліміне жатқызылған болатын. Оқиға көршілерді таң қалдырды. Жұрт бұл жерде отбасы алты жылдай тұрып, ешкіммен жанжалдаспағанын айтады.