Ақтөбеде әйел мен ер адамды пышақтап, үйін өртеп кеткен

Ақтөбе облысында екі адамды жауыздықпен пышақтап өлтіріп, үйін өртеп кеткен оқиғаға қатысты сараптама жүріп жатыр. 

Оқиға 31 желтоқсан күні түнде Ақтөбе облысы Темір ауданы Кеңқияқ кентінде болған. Марқұмдардың туыстық қатынасы жоқ. Әйел адамның маскүнемдікпен есепте тұрғаны айтылады. 

Ауыл тұрғындары оқиғаны сан-саққа жүгіртуде. Айтуларына сенсек, белгісіз адамдармен жанжал туындап, ер адамды бірнеше жерінен пышақтаған.

Оқиға куәгері болған әйел адамды да өлтіріп, кілемге орап, үйге өрт қойған болуы мүмкін. 

«Екі адамның денесі табылған оқиғаға қатысты қылмыстық іс қозғалды. Тергеу амалдары жүруде. Сараптама тағайындалды»  деді облыстық ПД-нің баспасөз қызметі.    

Ақтөбе облыстық ПД-і оқиғаның мән-жайы анықталып жатқанын хабарлады. 

Ақтөбе, Ардақ Ерубаева