Ақтөбе облысында екі  жолды еріген қар суы  шайып кетті

Бір тәулікте коммуналдық қызмет 2,5 мың текше метр суды сорғызды. Су тасқынының алдын алу жұмыстарына  89 су сорғыш техника  тартылған.

Коммуналдық қызметшілер еріген суды сорғызып үлгермейтінін мойындап отыр. Күннің күрт жылынуы мен жауын-шашын салдарынан Ақтөбеде көшелерді су басты. Еріген қар мен жауын-шашын суы ағуға тиіс арық жүйесі де ағынды көтере алмайды.

— Арық жүйесінің жаңартылмаған тұсындағы  – су ешқайда ақпайды. Сондықтан тек бір жерге жиналады және одан шығудың жолы жоқ. Бұндай жағдайдан құтылу үшін бірыңғай арық жүйесі керек, – дейді сектор меңгерушісі Серік Дәулет.

Тұрғындар болып жатқан жағдайға наразы. Біреулер бұл мәселе көшедегі қардың дер кезінде шығарылмауынан туындады деп есептейді.

Облыстың алты ауданында су тарту жұмыстары жүргізілуде. Байғанин ауданына қарасты үш ауыл сыртқы байланыстан ажыраған, себебі бір емес, екі бірдей жолды су шайып кеткен. Салдарынан халық азық-түлікті көрші Атырау облысынан сатып алуға мәжбүр болып отыр.

«Соның салдарынан Миялы, Оймауыт және Дияр елді мекендеріне тікелей қатынау тоқтады. Қалпына келтіру жұмыстары еріген су деңгейі төмендеген кезде жүргізіледі»  деп хабарлады облыс әкімдігінің баспасөз қызметі.

Жергілікті атқарушы органдар мен полиция қызметкерлері кезекшілік ұйымдастырды.

Сондай-ақ, Байғанин ауданы, Ноғайты ауылына кіреберіс  жолдың кейбір  бөлігін де су шайған. Соның салдарынан Ноғайты елді мекеніне қатынас жоқ. Жол төсемін нығайту жұмыстары жүргізілуде.