Ақтөбе облысы білім саласындағы жемқорлықпен күреспек

Облыста қаржыны орталықтандырылған басқару және кадрларды іріктеу бойынша пилоттық жоба енгізіледі.

Ақтөбе облысының басшысы Ералы Тоғжанов білім саласындағы сыбайлас жемқорлықтың алдын алу бойынша кеңес өткізді, деп хабарлайды Orda.kz. облыс әкімдігінің баспасөз қызметіне сілтеме жасап.

Әкім осы саладағы сыбайлас жемқорлыққа қарсы шаралардың тиімділігін арттыру қажеттігіне тоқталды.

«Білім беру саласындағы сыбайлас жемқорлық тәуекелдері жоғары. Сондықтан бірінші басшылардан бастап бұл мәселені қатаң бақылауға алу керек. Бюджет қаражатының аударылуына бақылауды күшейту, қаражатты үшінші тұлғаларға аудару тәуекелдерін болдырмау шаралары қабылдануы керек», - деді Тоғжанов.

Облыста қаржыны басқару, мемлекеттік сатып алу және кадрларды іріктеудің орталықтандырылған үлгілік пилоттық жобасы енгізіледі. Жоба Білім министрлігі тарапынан қолдау тапқан.

«Жоба білім беру ұйымдарында бюджет қаражатын пайдаланудың ашықтығын қамтамасыз етеді, қаржыны жоспарлау және басқару процесін жеңілдетеді, мемлекеттік сатып алулар мен педагогикалық кадрларды іріктеу үдерістерінде сыбайлас жемқорлық тәуекелдерін азайтады. Пилоттық жоба АҚШ, Австралия, Финляндия, Сингапур және Швеция сияқты елдердегі мемлекеттік сатып алу мен қаржыны орталықтандырылған басқарудың оң тәжірибесіне негізделетін болады» деп атап өтті әкімдікте.

Білім беру ұйымдары басшыларын тағайындау және мұғалімдерді жұмысқа қабылдау рәсімдері де орталықтандырылып, электронды форматқа көшіріледі.

2023 жылы облыста білім беруді қаржыландыруға 248 миллиард теңге қарастырылған, бұл облыстық бюджет шығыстарының 40 пайызы болады.