Ақтауда жаңа туған нәрестені сатпақ болды

Күдіктілер сәбиді сату кезінде  ақша алып жатқан жерінде ұсталды.

Маңғыстау облысында полицейлер жаңа туған нәрестені сату фактісінің жолын кесті. Екі күдікті ақша алып жатқан жерінде ұсталды, деп хабарлайды Orda.kz. Polisia.kz сайтына сілтеме жасап.

«Маңғыстау облысы бойынша ІІМ Ұйымдасқан қылмысқа қарсы күрес басқармасына жаңа туған нәрестені сату фактісі бойынша жедел ақпарат келіп түсті. 35 жастағы күдіктіні ұстау операциясы 4 мамырда жүргізілген. Әйел балаға ақша алып жатқан жерінде ұсталды. Оның тұрғылықты жерінде тінту кезінде заттай айғақтар алынды», - деп хабарлады құқық қорғау органдары.

Екінші күдікті, яғни  жаңа туған нәрестені сатып алмақшы болған 38 жастағы әйел де ұсталды. Сот шешімі шыққанға дейін сәби Ақтау қаласындағы облыстық мамандандырылған балалар үйіне орналастырылды.

Аталған факті бойынша Маңғыстау облысының полиция департаменті ҚР Қылмыстық кодексінің 135-бабы 2-бөлігі «Кәмелетке толмағандарды саудалау» бойынша сотқа дейінгі тергеу амалдарын бастады.

Күдіктілер кінәсін мойындады. Сотқа дейінгі тергеу жалғасуда. Басқа мәліметтер тергеу мүддесіне қатысты жарияланбайды.