Ақтауда дәрігерлер жаппай уланды

Ақтауда Ауызашардан кейін жаппай улану болды. Мейрамхана қонақтарының арасында 50 дәрігер болды, деп хабарлайды Lada.

Бұл туралы терапевт, пульмонолог Индира Атажанова айтты. Маңғыстау облыстық көпсалалы ауруханасының жұқпалы аурулар бөлімінің меңгерушісі Гүлбану Нұржанованың айтуынша, ауруханаға улану белгілерімен 16 адам түскен. Науқастарда жоғары температура, құсу, сұйық нәжіс, жалпы интоксикация – жедел ішек инфекция ауруы байқалады. Дәрігерлер қажетті шараларды қабылдап, емдеу жүргізілуде, өмірге қауіп жоқ, дейді ауруханада.

«Ауруханаға 16 адам жүгінді, оның 10-ы ауруханаға жатқызылды. Сараптамалар алынды, нәтижесі үш-төрт күн ішінде белгілі болады. Ешкімнің өміріне қауіп төнген жоқ, барлығы хаттама бойынша ем алады. Уланған дәрігерлердің көпшілігі іш ауруына шағымданды», — деп түсіндірді Гүлбану Нұржанова.

Терапевт, пульмонолог Индира Атажанова дәрігерлердің жаппай улануы Ақтаудағы мейрамханалардың бірінде болған ауызашардан кейін болғанын айтты.

«Әзірге ауызашар қай мейрамханада болғанын айта алмаймыз. Жағдайды анықтау үшін олармен келіссөздер жүргізіп жатырмыз. Барлығы 50 адам уланған – олардың барлығы дәрігерлер. Жағдай сұмдық, бәрі осылай болады деп ойлаған жоқпыз», – дейді Индира Атажанова.

Ақтау әкімдігінің баспасөз қызметі ақпаратты растады. Айтуларынша, 10 сәуірде қаладағы мейрамханалардың бірінде ауызашар өтіп, оған аудандар мен қаладағы емдеу мекемелерінің дәрігерлері шақырылған. Мерекелік шараға барлығы 50 адам қатысты. Оның ішінде 16 адамда улану белгілері білінген.