Ақтау мұғалімдері Түркияда зардап шеккендерге күштеп ақша жинап жатқанына шағымдануда

Ақтаудағы мектеп мұғалімдерінің айтуынша, 9 ақпан күні сағат 00:00-де мектеп директоры корпоративтік чатқа дауыстық хабарлама жолдап, онда Түркияда жер сілкінісінен зардап шеккендерге көмек көрсету үшін бір күндік табыстарын аудару қажеттігін айтқан.

Бірер минуттан соң мектеп басшысы бұл шешіммен барлығы келіскенін хабарлаған, дегенмен ұстаздар пікір айтуға да үлгермегендерін айтуда.

№16 орта мектептің директоры Айман Нұрабаева бұндай көмекке мұғалімдерді ешкім мәжбүрлемейтінін айтты, деп хабарлайды Lada.kz.

— Бұған дейін Арыстағы зардап шеккендерге көмек жинадық. Түркияда зардап шеккендерге де көмектесуді ұсындым. Менде жаман ниет болған жоқ. Мен жай ғана көмектескім келді, барлық мұғалімдер қолдайды деп ойладым. Кез келген адам Kaspi арқылы ақша жібере алатын. Таңертең мен жиналыс өткіздім, онда әркімнің өз қалауын өзі шешуге құқығы бар екенін тағы бір рет түсіндірдім, - дейді бұл туралы Айман Нұрабаева.

Мектеп директорының айтуынша, мұғалімдердің орташа жалақысы 200 мың теңге екен. Директор оның көмектесуге деген  бастамасы жанжалға ұласады деп ойламағанын айтады.

— Мектеп директоры Түркия халқына көмектесу туралы бастама көтерді. Мен оның әрекетінен билікті асыра пайдалануды көрмеймін. Бәлкім, оны кейбіреулер түсінбеген болар, сондықтан осындай келеңсіз жағдай туындады, - деп түсіндірді Ақтау қаласы әкімдігі білім бөлімінің басшысы Бағдат Тұрғанбаева.

Еске салайық, өткен жылы «Антикорға» білім беру ұйымдарында заңсыз ақша жинау туралы 40-тан астам өтініш түскен. Сыбайлас жемқорлыққа қарсы іс-қимыл агенттігінің Алматы облысы бойынша департаментінің орынбасары Нұрсұлтан Бекінов білім беру ұйымдарындағы ақша жинау түрлі себептермен тоқтамайтынын мәлімдеді. Ол заңсыз ақша жинау фактілері анықталса, кінәлілерге қылмыстық жауапкершілікке дейін барынша қатаң шаралар қолданылатынын ескертті.