Ақсу қаласының тұрғынын полиция есірткі сатады деген видео түсіруге мәжбүрлеген

ҚР Ішкі істер министрлігі әлеуметтік желідегі ер адамның  Павлодар облысының полицейлері синтетикалық есірткі сатумен айналысады деген мәлімдемесі бар атышулы видеоға жауап берді.

Telegram арналарының бірінде белгілі бір Виталий Балобан атты азаматтың полицияның есірткі сататынын айтқан видеосы  жарияланды.

ҚР ІІМ бұл видеоны көрсетуге  ер адамның  мәжбүр болғанын және 26 жастағы Ақсу тұрғынының арызы бойынша Павлодар облыстық полиция департаменті осы фактімен «Бопсалау» бабы бойынша сотқа дейінгі тергеу амалдарын жүргізіп жатқанын хабарлады.

«Бұған дейін желіде жәбірленуші полицияны есірткі сатуда онымен ынтымақтасады деп айыптаған видео тараған болатын. Қарашаның 11-і күні жәбірленушінің өзі полицияға арызданып, таныстары одан ақша бопсалап, көлігін тартып алып, бопсалау мақсатында полиция қызметкерлеріне қарсы бейнежазба түсіруге мәжбүрлегенін айтты. Бопсалаушылардың талабын орындаудан бас тартқан соң, олар видеоны жариялаған» деп түсіндірді полиция.

Павлодар облыстық полиция департаменті бастығының орынбасары Рашад Өтеуов ақша бопсалады деген күдікпен қазірдің өзінде 1989, 1994, 1995 жылы туған Ақсу қаласының жұмыссыз үш тұрғыны ұсталғанын айтты.

— Күдіктілер Павлодар қаласындағы уақытша ұстау изоляторына қамалды. Бірақ жәбірленушінің күдіктілердің қысымымен видео түсіргені туралы мәлімдемесіне қарамастан, видео материалдары бойынша әлі де тексеру жүргізілуде. Қорытындысы бойынша әрбір қатысушының әрекетіне құқықтық баға беріледі, — деді Рашад Өтеуов.