АҚШ-тағы банктердің жабылуы Қазақстанның қаржы нарығына қалай әсер етті

Құбылмалылықтың күшеюі және ұлттық валютаның долларға қатысты әлсіреуі байқалады.

10-12 наурызда технология секторына қызмет көрсететін АҚШ-тың екі банкі – Silicon Valley Bank және Signature Bank жабылатыны жарияланды. Нәтижесінде әлемдік қаржы нарықтары құбылмалылықтың жоғарылауын және инвесторлардың тәуекелге деген қызығушылығының төмендеуін бастан кешіруде, бұл АҚШ пен Еуроаймақтағы банк секторына қатысты алаңдаушылықтан туындады. Бұл туралы Қазақстан Республикасы Ұлттық банкі хабарлайды.

Реттеушінің айтуынша, АҚШ-тағы жергілікті дағдарыстың Еуроаймақ банктеріне әсер ету қаупі швейцариялық Credit Suisse банкі акциялары құнының төмендеуіне әкелді. Швейцарияның Орталық банкі нарыққа деген сенімді қалпына келтіру үшін банкке төтенше өтімділік беру туралы шешім қабылдағанын хабарлады.

«Соңғы күндері жаһандық оқиғалар ішкі валюта нарығында көрініс табуда. Құбылмалылықтың артуы және ұлттық валютаның АҚШ долларына қатысты әлсіреуі байқалады, бұл мұнай бағасының барреліне 73-74 доллар деңгейіне дейін төмендеуімен қиындады» деп түсіндірді Ұлттық банк.

Бұл ретте «АҚШ пен Еуроаймақ банктеріндегі жергілікті дағдарыстардың Қазақстанның қаржы нарығына әсері шектеулі» екені атап өтіледі. Профициттің сақталуын ескере отырып, банк жүйесінде өтімділік жеткілікті.

Ұлттық банк валюта нарығындағы өтімділікті қолдау және айырбас бағамының күрт ауытқуын тегістеу үшін валюталық интервенциялар жүргізу құқығын өзіне қалдырады. Бұл теңгенің негізді құбылмалылығын шектемей, нарықтық айырбас бағамын қалыптастыру тетіктерін қолдауға мүмкіндік береді.

Қажет болса, мұндай араласулар жасалады.