АҚШ Қазақстанға санкция салуы мүмкін

АҚШ ресейлік «МИР» ұлттық төлем жүйесін Қазақстанда қолдағаны үшін санкция салуға дайын. 

Бұл туралы ақпарат АҚШ қаржы министрлігінің сайтындағы құжатта көрсетілген.

«Шетелдік активтерді бақылау басқармасы (OFAC) Ресейге қарсы санкцияларды айналып өту, соның ішінде NSPK (Ұлттық төлем карточкалары жүйесі. – Ред.) және «МИР» ұлттық төлем жүйесін Ресей Федерациясының аумағынан тыс пайдалануды кеңейту бойынша санкция қолдануға дайын» делінген хабарламада.

Ресей премьер-министрдің орынбасары Дмитрий Чернышенко бұған дейін айтқандай, қазір Оңтүстік-Шығыс Азия, Таяу Шығыс, Латын Америкасы және Қытай елдерінде «МИР» төлем жүйесін енгізу жұмыстары жүргізілуде.

«МИР» жүйесін 11 шет елде, атап айтқанда Түркия, Вьетнам, Армения, Оңтүстік Корея, Өзбекстан, Беларусь, Қазақстан, Қырғызстан, Тәжікстан, сондай-ақ мойындалмаған Оңтүстік Осетия мен Абхазияда қолдануға болады.