Apple компаниясы 92 елдегі пайдаланушыларға шпиондық шабуыл туралы ескертеді

Apple 92 елдегі iPhone пайдаланушыларына хабарландырулар жіберді.

Бұл туралы TechCrunch интернет-басылымы хабарлады.

«Apple сіздің Apple идентификаторыңызбен -xxx- байланыстырылған iPhone құрылғысын қашықтан бұзуға әрекеттенетін зиянды шпиондық бағдарлама шабуылына ұшырағаныңызды анықтады» делінген хабарламада.

Компания шабуыл пайдаланушылардың белсенділік түріне қатысты болуы мүмкін екенін түсіндіреді.

«Бұл шабуыл сіздің кім екеніңізге және не істеп жатқаныңызға байланысты сізге бағытталған болуы мүмкін. Біз сізге бұл хабарламаны жіберуге не түрткі болғаны туралы қосымша ақпарат бере алмаймыз, себебі ол шабуылдаушыларға болашақта анықталмау үшін мінез-құлқын бейімдеуге көмектесуі мүмкін» делінген Apple хабарламасында.

iPhone өндірушісі осындай хабарландыруларды жылына бірнеше рет жібереді және 2021 жылдан бері 150-ден астам елдегі қауіптер туралы пайдаланушыларды ескертті.