Апелляция Дикий Арманның ісі бойынша үкімді өзгеріссіз қалдырды

Қаңтар оқиғасына қатысты іс бойынша апелляция соты үкімді өзгеріссіз қалдырды. Дикий Арман мен оның серіктерінің жазасы жеңілдетілмеді, деп хабарлады Orda.kz.

Апелляциялық алқа Қаңтар оқиғасы бойынша қаралған іс жөнінде шешім шығарып, Арман Жұмагелдиев, бұрынғы мәслихат депутаты Қайрат Құдайберген және ҰҚК-ның бесінші департаментінің экс-басшысы Руслан Ысқақовқа тағайындалған жазаларды азайтудан бас тартты.

Бұған дейін сот оларды жаппай тәртіпсіздікті ұйымдастыру және оған қатысу, адамдарды ұрлау және қаруды заңсыз сақтау қылмыстары бойынша кінәлі деп тапқан.

Нәтижесінде Дикий Арман 20 жылға, Құдайберген сегіз жылға, ал Ысқақов 15 жылға бас бостандығынан айырылған.

«Сот шешімімен келіспейміз» — Дикий Арманның адвокаты

Жұмагелдиевтің адвокаты Олег Чернов Orda.kz тілшісіне пікір білдірді.

«Апелляциялық инстанция бірінші инстанция сотының үкімін өзгертуге немесе күшін жоюға әсер ететін біз келтірген уәждерді қайта тексерген жоқ. Біз көрсеткен құқықбұзушылықтар бойынша түсіндірмелерді түпкілікті қаулыдан көретін боламыз. Бірақ сот түсіндіру барысында ештеңе айтпады. Менің ойымша, процессуалдық жағынан да көптеген бұзушылықтар болды. Апелляция шешімімен де, бірінші инстанция үкімімен де біз келіспейміз», — деді адвокаты.

Еске сала кетейік, 20 қараша күні Алматыдағы СИ-18 изоляторында Қаңтар ісі бойынша айыпталған 29 адамға үкім шықты. Сот жабық өтті. Н.Ерасыл 18 жылға, тағы бірнеше адам 7–13 жылға, қалғандары 1–4 жылға сотталды. Тергеу оларды Арман Жұмагелдиевтің тобына қатысы бар деп есептейді.