Апатта қаза болған әзірбайжандық бортсеріктің күйеуі өтемақыны қайтарып берді

Ақтауда апатқа ұшыраған ұшақтың бортсерігі Хёкума Әлиеваның күйеуі 12 млн теңге көлеміндегі өтемақыдан бас тартты, деп хабарлайды Orda.kz. 

Teleqraf.com мәліметінше, Хёкума Әлиеваның жұбайы Этибар Әлиевтің өтемақыдан бас тартқаны жайлы бортсеріктің әкесі Жалил Әлиев хабарлады. Хёкуманың күйеуі, заңды мұрагер ретінде, мемлекет ұсынған 40 000 манат (шамамен 12 млн теңге) көлеміндегі сақтандыру төлемі мен өтемақыдан бас тартты.

«Біз оған мемлекетіміз тарапынан бөлінген барлық қаражатты тапсырдық, бірақ ол бұл ақшаны қабылдамай, қайтарып берді»,  деп хабарлады Ж.Әлиев.

Э.Әлиев өзіне ұсынылған өтемақы қаражатынан бас тартқанын растады, бірақ оған қатысты пікір де білдіргісі келмеді.

Еске салсақ, апат салдарынан зардап шеккен әрбір адамға 20 000 манат көлемінде, ал қайтыс болғандардың отбасы мүшелеріне 40 000 манаттан өтемақы төленген болатын.

Сондай-ақ, батыр қыз жайлы Әзірбайжанның еңбек сіңірген өнер қайраткері, режиссер, сценарист Зия Шихлинский жаңа фильм түсіруге дайындалып жатыр. 

Апаттан аман қалғандар дәл осы қыздың батылдығын атап өтіп, соңғы сәттерде тәртіп пен сабырлық сақтау үшін барын салғанын айтқан еді. 

Хёкюма Әлиева 1991 жылы Кәлбаджар ауданында дүниеге келген. Тұрмыс құрған, баласы жоқ. Бортсеріктің анасы қызының ерлігін, батырлығын айтқанда көзіне жас алып, әкесі қызын өз қолымен жерлеген еді.