Апатқа ұшыраған жойғыш ұшақтағы ұшқыштың біреуі ауруханаға түсті

16 сәуірде Қарағанды ​​облысында қонуға жақындаған кезде Қорғаныс министрлігінің Су-30 SM жойғыш ұшағы апатқа ұшырағаны туралы жазған болатынбыз.

Экипаж құтқарылған, бірақ белгілі болғандай, ұшқыштардың біреуінің омыртқасы сынып, ауруханаға түсті.

— Ұшқыштардың біреуінің кеуде тұсындағы омыртқасы сынған, екіншісінің  ауруханаға жататындай жарақаты жоқ. Қазіргі уақытта екі ұшқыш та дәрігерлердің бақылауында, деп хабарлады Қорғаныс министрлігінің баспасөз қызметі.

Апат болған жерде оқиғаның себептерін анықтау үшін комиссия жұмыс істеп жатыр.

Анықталғандай, әуеге көтерілгеннен кейін қозғалтқыштардың бірінен өрт шыққан. Катапультталуға болатыны туралы бұйрық алғаннан кейін әскери ұшқыштар ұшақты ауылдан алыс жерге, далаға қарай бағыттаған.

Бейбіт тұрғындарға ешқандай қауіп төндірмейтіндігіне көз жеткізгеннен кейін экипаж бұйрықты орындаған.