Павлодарлық полицейдің туыстары оның өзіне қол жұмсамағанын айтты

5 шілде кешке Павлодар облысы Ақсу қаласында полиция қызметкерінің жансыз денесі гаражда табылған. Туыстарының айтуынша, оған жұмыста қысым көрсетілген.

Бұл туралы Orda.kz Еуразия бірінші арнасына сілтеме жасап хабарлады.

Өзіне қол жұмсаған полицей Аспандияр Айтқазиннің туыстары «ол өзіне қол жұмсады» дегенге сенбейді. Себебі, оның артында үш баласы бар.

Олар полиция қызметкерінің видеоүндеуін тапқан.

Еске салсақ, Ақсу қаласында өлі табылған полицей сол бөлімде басшы орынбасары қызметін атқарған. Бірақ қағаз жүзінде ол ауылдық учаске қызметкері ретінде жазылған.

Туыстарының айтуынша, қайғылы жағдай орын алмай тұрып, оған басшылық «жұмыс орнын ауыстыруға» өтініш жазуға мәжбүрлеп, оған қысым көрсеткен. Марқұм қағазда жазылғандай ешқашан учаскелік полицей болып жұмыс істемеген.

– 2021 жылдың басынан бастап менің күйеуіме Ақсу қалалық полиция бөлімінің, сондай-ақ Павлодар облыстық полиция департаменті басшылығы мен орынбасары қоқан-лоқы көрсетіп, қорқытты. Сізден бұл істі жеке бақылауыңызға алуды сұраймын, - деп марқұмның әйелі Мейрамгүл Айтқазина ел президенті Қасым-Жомарт Тоқаевқа жүгінді.

Майордың туыстары кінәлілер жазадан құтылып кете ме деп қорқып отыр. Тергеушілер Аспандияр Айтқазиннің қайтыс болар алдында жасаған үндеуі бар телефонды отбасынан тартып алған.

– Куәгерлермен бірге телефонға құпиясөз енгізіп, үндеуді көрген. Ол жерде «Егер маған бірдеңе болса, полиция подполковнигі Балғабай Қапаров кінәлі деп біліңіз» деген. Бізге видеоның көшірмесін жасауға тыйым салынды, мен бұл видеоны өшіріп тастайды деп қорқамын, - деді марқұмның туысы Әсемгүл Смағұлова.

Марқұм Аспандиярдың өзіне қол жұмсағаны күмән бар.

Белгілі болғандай, бұл павлодарлық полиция қызметкерлерінің өзіне қол жұмсаудың төртінші оқиғасы.

Оқиға бойынша облыстық полиция департаменті түсініктеме беруден бас тартты.