Аңызға айналған «Меломанды» қазақстандық кәсіпкер сатып алды

2024 жылдың соңында Қазақстандағы сауда нарығында «Меломан-Marwin» дүкендер желісі жаңа иелерінің қолына өтті. Оның негізін қалаушылар Александр мен Игорь Дериглазовтар өз активтерінің шамамен 50%-ын елдегі ең ықпалды кәсіпкерлердің бірі Қайрат Итемгеновке тиесілі Aqniet Group компаниясына сатты, деп хабарлайды Orda.kz Forbes басылымына сілтеме жасап.

35 жылдық тарихы бар «Меломан» бүгінде әлемдік алпауыт брендтердің – Sony PlayStation, Disney, LEGO және басқалардың Қазақстандағы ең ірі дистрибьюторы саналады. Компанияның Қазақстан мен Ресейде 30-дан астам дүкені және онлайн сауда алаңдары бар.

Александр Дериглазовтың Forbes Kazakhstan-қа берген сұхбатына қарасақ, оны сату туралы алғашқы келіссөздер бір жыл бұрын басталғанымен, нақты мәміле тек 2024 жылдың жазында талқылана бастаған. Күзге қарай келісім аяқталды, алайда оның қаржылық шарттарын құпия сақтап отыр.

«Бұл құрылымы күрделі мәміле болды. Біз үш ресейлік және төрт қазақстандық компанияны, «Меломан» мен Marwin брендтерін, халықаралық серіктестермен келісімшарттарды саттық, бірақ Алматыдағы Гоголь көшесі, 58-үйдегі дүкен секілді өзімізге тиесілі ғимараттарды бұл келісімге қоспадық», — дейді Дериглазов.

Мәміленің нақты сомасы жарияланған жоқ, алайда сарапшылар оның ондаған миллион доллар болғанына сенімді. Жаңа иелері брендтің тұжырымдамасын сақтап қана қоймай, қазақ әдебиетін халықаралық деңгейге шығаруды мақсат етіп отыр.