Қаныш Бижанов: туберкулезбен ауырғандар саны азайып келеді

2020 жылы Солтүстік Қазақстан облысында 219 адамнан туберкулез ауруы анықталды, деп хабарлайды ORDA тілшісі.

24 наурыз – туберкулезбен халықаралық күрес күні. Осыған байланысты 24 ақпаннан бастап туберкулез ауруының алдын алуға бағытталған айлық жүріп жатыр. Айлық аясында СҚО фтизиопульмонология орталығында «ашық есік» күні өтті.

Қаныш Бижановтың айтуынша, өңірде туберкулезбен ауырғандар саны азайып келеді. 2019 жылы туберкулезбен 348 адам ауырса, 2020 жылы бұл көрсеткіш 2019-ды құраған. Яғни, 36,4 %-ға кеміген.

— Жаңадан 219 адам ауырса, тағы 112-сінде рецидив болды. Флюрографиялық тексерістен жоспарланған 354 мың адамның 328 мыңнан астамы өтті. Нәтижесінде 123 науқас анықталды. Жоспарды аудандарда 100 % орындауға карантиндік шектеулер кедергі болды. Сондай-ақ бактериоскопиялық және Gxpert әдісімен 4 мыңға жуық тұрғын тексерілді. 247 адамның бактерия бөлетіндігі анықталып, 198 адамда оң нәтиже болды, дейді Қаныш Бижанов.

Қазіргі таңда 40 мыңнан астам баладан туберкулез сынамасы алынды. Диаскинтест арқылы 6 мыңға жуық бала тексеріліп, оның 5774-не туберкулезге қарсы екпе егілді.

— Туберкулезбен ауырғандарға әлеуметтік көмек қарастырылған. Былтыр 30 млн 237 мың теңге 528 сырқатқа берілді. Бір адамға ай сайын 16 668 мың теңге көмек бар. Алайда бұл көмек барлық ауданда бірдей көрсетілмейді. Мәселен Тайынша және Ақжар аудандарында үш айда бір рет, ал Петропавлда 27 780 теңге жылына бір рет қана беріледі, дейді СҚО фтизиопульмонология орталығының бас дәрігері міндетін атқарушы Қаныш Бижанов.