Антикор төрағасы: біз үшін бюджет ақшасының ұрланбауы маңызды

ҚР Сыбайлас жемқорлыққа қарсы іс-қимыл агенттігінде ауыл шаруашылығын субсидиялау саласындағы сыбайлас жемқорлық тәуекелдерін кешенді талдау нәтижелерін қарау жөніндегі кеңес отырысы өтті.

Отырыс кезінде агенттік төрағасы Марат Ахметжанов агенттіктің мал субсидиясына қырын қарамайтынын, керісінше оның ұлттық мәселеге айналғанын атап өтті. Агенттіктің отырыстан үзінділерді telegram арнасында жариялады.

«Бәрін көзбояушылық пен тапсырманы орындау туралы есеп үшін жасауға болмайды. Бұл ретте жұртшылық пен фермерлерді жұмысқа көзбояушылық үшін емес, шынайы жұмылдыру қажет. Олар өз ұсыныстарын білдіріп, егер нақты ұсыныстары болса, тіпті ережелер жазуы тиіс» деп атап өтті М. Ахметжанов.

«Агенттік агросаясатқа еш араласпайды. Біз маман емеспіз, фермер емеспіз. Біз үшін бюджет ақшасының ұрланбауы және онда жемқорлықтың болмауы маңызды. Ең бастысы, субсидияларды шынымен лайықты, өндірісті дамытып, жұмыс орындарын құрып, халық үшін өнімді арзандатып, ел экономикасын көтеретіндер алуы керек» деп атап өтті сыбайлас жемқорлыққа қарсы агенттік төрағасы.

Өз кезегінде Агенттіктің сотқа дейінгі тергеу қызметінің басшысы А. Жұмағали талдау барысында анықталған негізгі сыбайлас жемқорлық тәуекелдерін белгілеп, тергеудің өзекті нәтижелерін атап өтті. Бүгінде өндірісте 54 іс бар. 22 адам күдікті деп танылып, 16 адамның іс-әрекеті сараланды. Оның 14-і қамауда, екеуі үй қамағында. Қылмыстық жауапкершілікке тартылғандар арасында - 11 лауазымды тұлға, оның ішінде ҰАҒБО-ның 2 қызметкері бар. 2 адам сотталды. Бұл істер бойынша алдын ала шығын 2,6 млрд теңгеден асады.