Антикор орманшыларды жемқорлық жасады деп күдіктенеді

Орман шаруашылығы және жануарлар дүниесі комитетінің бірқатар шенеуніктері сыбайлас жемқорлыққа қатысы бар деген күдікке ілінді.

Шымкент қаласының Сыбайлас жемқорлыққа қарсы қызметі ҚР Экология және табиғи ресурстар министрлігі Орман шаруашылығы және жануарлар дүниесі комитетінің «Сайрам-Өгем мемлекеттік ұлттық табиғи паркі» республикалық мемлекеттік қазыналық кәсіпорнының бас директорына қатысты сотқа дейінгі тергеу амалдарын жүргізуде.

«Қазіргі уақытта шенеуніктер ұсталып, уақытша ұстау изоляторына қамалды. Тергеу жалғасып жатыр. Тергеу мүддесіне қатысты басқа ақпарат жария етілмейді» деді министрлік.

Бұл іске орман шаруашылығы бас директорымен бірге комитеттің есеп және бюджеттік жоспарлау бөлімінің бастығы да араласып жатқаны белгілі. Олардың барлығы алдау және сенімге қиянат жасау арқылы бөтеннің мүлкін жымқырды, пара берді және алды деген күдікке ілінген.