Антикор Мәдениет министрлігі шенеуніктеріне қатысты іс қозғады

Мемлекеттік кәсіпорын ғимаратын арзан бағамен иеліктен шығару фактісі бойынша тексеру жүргізілуде, деп хабарлайды Сыбайлас жемқорлыққа қарсы іс-қимыл агенттігінің баспасөз қызметі.

 «Нұр-Сұлтан қаласы бойынша Сыбайлас жемқорлыққа қарсы қызмет «Республикалық мектеп» мемлекеттік кәсіпорнының ведомстволық бағынысты ғимаратын иеліктен шығару фактісі бойынша ҚР Мәдениет және спорт министрлігінің лауазымды тұлғаларына қатысты сотқа дейінгі тергеу жүргізіп жатыр.

Лауазымды тұлғалар Алматы қаласындағы «Су және қолданбалы спорт түрлері бойынша республикалық жоғары спорт шеберлігі мектебі» мемлекеттік кәсіпорнының ведомстволық бағыныстағы ғимаратын үлестес заңды тұлғаның пайдасына жеңілдетілген бағамен иеліктен шығару фактісі бойынша мемлекет мүдделеріне ауыр зардаптар әкелген.

Сыбайлас жемқорлыққа қарсы іс-қимыл агенттігі іске қатысты басқа ақпарат берген жоқ.

Бұған дейін экс-Мәдениет министрі, ҚР Ұлттық музейінің директоры Арыстанбек Мұхамедиұлына қатысты тергеу жүріп жатқанын хабарлаған болатынбыз. Ол әлі де қамауда.