Антикор Кентау экс-әкіміне қатысты тергеуді аяқтады

Антикор Түркістан және Кентау қалаларының бұрынғы әкімі Рашид Аюповқа қатысты тергеуді аяқтады.

Бұл туралы Сыбайлас жемқорлыққа қарсы қызмет хабарлады.

«Сыбайлас жемқорлыққа қарсы қызмет Кентау қаласының экс-әкіміне қатысты тергеуді аяқтады. Ол 2013 жылы премьер-министр кеңсесінің қызметкері бола тұра, жеке компанияның иесін жауапты шенеуніктерді аса ірі көлемде пара беруге үгіттеп, оның орнына құрылыс тендерін ұтып аламыз деп уәде берген. Қажетті ақшаны алып, оны өзіне иемденіп, ақшаның бір бөлігін Астанадан жаңа үй, қымбат көлік пен бірнеше жүк көлігі сатып алуға жұмсаған» деп хабарлады «Антикор» баспасөз қызметі.

Аюповтың әрекеті аса ірі көлемде пара беруге итермелеу және алаяқтық деп сараланып, ол тергеу сотының санкциясымен қамауға алынды.

«Қазіргі таңда қылмыстық іс материалдар шешімнің заңдылығын тексеру және одан әрі сотқа жолдау үшін Астана қаласының прокуратурасына жіберілді», - деп толықтырды ведомство.

Еске салайық, Аюповтың ұсталғаны туралы наурыз айының соңында белгілі болды.