Антикор экс-министр Бекетаевтың ұсталғаны туралы ақпаратты растады

Сыбайлас жемқорлыққа қарсы қызмет бұрынғы әділет министрі Марат Бекетаевтың ұсталғаны туралы ақпаратты растады.

Бұған дейін ведомство бұрынғы әділет министрінің өкілеттігін асыра пайдаланды деген күдікпен ұсталғанын хабарлаған. Алайда шенеуніктің кім екені  айтылмады.

Бекетаев айқын қажетсіз қызметтерді көрсетуге жыл сайын шарт жасасып, сол арқылы мемлекетке аса ірі көлемде зиян келтіріп, аффилиирленген компанияның мүддесіне қамқорлық жасағаны белгілі.

«Ұсталған адамның бұрынғы әділет министрі М.Бекетаев екенін растаймыз. Қазіргі уақытта күдікті сот санкциясымен қамауға алынды. Тергеу мүддесіне қатысты басқа мәліметтер жария етілмейді» делінген Антикор хабарламасында.

Бұған дейін Orda.kz бұрынғы шенеуніктің қамауға алынуының мән-жайын білген болатын. Белгілі болғандай, 21 қазан күні таңертең ол ықтимал жазадан құтылу үшін Стамбулға, одан әрі Лондонға ұшпақ болған. Бұл ретте Бекетаевқа кетпеу туралы қолхат берілді.