Анталияда 7 ай бұрын жоғалып кеткен отандасымыздың мәйіті табылды

7 ай бұрын жоғалып кеткен қазақстандық бойжеткен Түркияда өлі күйінде табылды. 21 жастағы Арайлым Орынбаева 2020 жылдың мамырында Анталияда жоғалып кетті, деп хабарлайды ORDA Haberler.com сайтына сілтеме жасап.

Газеттің хабарлауынша, полиция қызметкерлері Қазақстан азаматшасын ұялы телефонының белгісі бойынша соңғы рет көрген жерді анықтаған. Іздеу Сарысу ауданындағы Анлтыняк көшесіндегі орман алқабына алып келді. Полиция орманда тінту жүргізген кезде Арайлым Орынбаеваның ағашта асылып тұрған денесін тапты.

Алдын ала мәліметтер бойынша, қыз өз-өзіне қол жұмсады, оның денесі Анталия сот-медициналық институтына жеткізілді. Басқа мәліметтер жария етілмеді.

Еске салсақ, 21 жастағы қазақстандық Арайлым Орынбаева 9 мамырда Түркияның Анталия қаласында жоғалып кетті. 41 жастағы анасы Салтанат Түркияға қызы мен екі ұлымен бірге көшіп келген. Оның айтуынша, 21 жастағы қызы не төлқұжатын, не ақшасын алмай үйден кетіп қалған.

Сыртқы істер министрлігінің баспасөз қызметі әйелдің жоғалғаны туралы ақпаратты растады.