Қандастар үшін Қазақстан азаматтығын алу жеңілдетілді

1 қыркүйектен бастап тарихи отанына оралған этникалық қазақтар үшін төрт мемлекеттік қызмет «бір өтініш» қағидаты бойынша көрсетіле бастады. «Қандас мәртебесін беру немесе ұзарту» қызметі қоныс аударушыларға қажет тағы үш қызметпен бірге көрсетіледі.

Бұл туралы Orda.kz хабарлайды.

Осылайша, көрсетілетін қызметті алушы жоғарыда аталған мемлекеттік қызметке өтініш бергеннен кейін «Қандастар мен қоныс аударушыларды қабылдаудың өңірлік квотасына енгізу», «Шетелдіктерге және азаматтығы жоқ адамдарға Қазақстан Республикасында тұрақты тұруға рұқсат беру», сондай-ақ «Қазақстан Республикасының азаматтығын қабылдауды, қалпына келтіруді және одан шығуды тіркеу» қызметтерін пайдалана алады, - делінген хабарламада.

«Бір өтініш» қағидаты бойынша қызмет көрсету мерзімдері:

• – қандас мәртебесін беру немесе ұзарту – 4 жұмыс күні;
• – қандастар мен қоныс аударушыларды қабылдаудың өңірлік квотасына енгізу – 14 жұмыс күні;
• – шетелдіктер мен азаматтығы жоқ адамдарға Қазақстан Республикасында тұрақты тұруға рұқсат беру – 45 күнтізбелік күн;
• – Қазақстан Республикасының азаматтығын алуды, қалпына келтіруді және одан шығуды тіркеу – 30 жұмыс күні.

Айта кетейік, құжаттарды қабылдау күні мемлекеттік қызмет көрсету мерзіміне кірмейді.