Қай жұмысшылардың жалақысы өсетіні белгілі болды

ҚР Еңбек және халықты әлеуметтік қорғау министрі Серік Шәпкенов үкіметтің 2 қыркүйектегі отырысында 2022 жылдың 1 қаңтарынан бастап қай салада жұмысшыларының жалақысы көтерілетінін айтты.

Бұл туралы Orda.kz хабарлады.

Еңбек министрлігінің мәліметінше, жаңа жылдан бастап Қазақстанда 558 мың жұмысшының жалақысы 20%-ға өседі. Мұғалімдердің, медицина қызметкерлерінің және әлеуметтік қызметкерлердің жалақысы 3-4 жыл ішінде екі есе өсті. Бұған дейінгі өсім мемлекеттік қызметшілердің кейбір санаттарына әсер етпеді: мұрағатшылар, кітапханашылар, орманшылар, техникалық персонал. Енді олардың жалақысы мұғалімдер мен медицина қызметкерлерімен бірге көтерілетін болады.

Еске салсақ, 1 қыркүйекте президент Қасым-Жомарт Тоқаев халыққа жыл сайынғы жолдауында үкіметке 2022 жылдың 1 қаңтарынан бастап ең төменгі жалақыны 60 мың теңгеге дейін жеткізуді тапсырды.

Президент «ең төменгі жалақы бойынша Қазақстан ТМД -ның бірқатар елдерінен төмен» деп мәлімдеді. Сондықтан оны 42 500-ден 60 мың теңгеге дейін өсіруді тапсырды.