Анасын мәжілістің мінберінде құттықтаған Назаров сотталған жасөспірімдерге не айтты?

Кеше ғана мәжіліс мінберінен анасын 70 жылдық мерейтойымен құттықтаған депутат Ардақ Назаров бүгін Алматы қаласы бойынша қылмыстық-атқару жүйесі департаменті №11 тәрбиелеу мекемесінде кәмелеттік жасқа толмаған сотталғандармен кездесті, деп хабарлайды Orda.kz.

Бас прокуратураның мәліметінше, кездесудің басты мақсаты — кәмелетке толмаған сотталғандардың түзелуге деген ынта-жігерін арттыру. Белгілі тұлғалармен әңгімелесу жасөспірімдер үшін құнды тәжірибе әрі шабыт көзі. Бұл әр бала өмірін өзгертіп, дұрыс жолға түсуге мүмкіндігі бар екенін көрсетеді.

Сонымен қатар, кездесуде Ардақ Назаровтан басқа ММА-дан дүркін әлем чемпиондары Қазыбек Әшімов пен Аңсар Дәулетбай және ММА жаттықтырушысы Батырбек Абылай болды.

Осы орайда айта кетейік, кеше ғана мәжіліс депутаты Ардақ Назаров ресми отырыс кезінде анасын туған күнімен құттықтады. Назаровтың бұл әрекеті жұртшылықтың назарынан тыс қалмады. Әлеуметтік желіде көпшілік депутатты сынап, ол жердің құттықтау жолдайтын емес, ресми заң шығарып, сауал тастайтын орын екенін жазды.