Анасы мен баласын қағып өлтірген жүргізуші 10 жылға сотталуы мүмкін

Ақтауда анасы мен баласын қағып өлтірген 42 жастағы жүргізуші 10 жылға бас бостандығынан айрылуы мүмкін.

Астана телеарнасының хабарлауынша, жол апаты жаяу жүргіншілер өткелінде орын алған.

Алған жарақатынан 29 жастағы келіншек оқиға орнында көз жұмды. Ал бес жасар қызы облыстық балалар ауруханасына жеткізілген. Бірақ бала есін жимастан қайтыс болған.

Қайғылы оқиға жарты түнде болған. Анасы мен баласы жаяу жүргіншілер өткелінен өткен бойда оларды көлік қағып кеткен. Бейнежазбада шетелдік көлік оларды 10 метрге дейін сүйреп апарғанын көруге болады.

«Бұл факт сотқа дейінгі тергеулердің бірыңғай тізіліміне ҚР Қылмыстық кодексінің 345-бабы бойынша тіркелген. Қазір тергеу амалдары жүргізілуде. Сот-медициналық сараптама тағайындалды» деді Маңғыстау облысы ДП баспасөз хатшысы Әйгерім Ибатуллаева.

Дәрігерлер қызға шұғыл түрде ота жасады, бірақ 1,5 сағаттан кейін бала операция үстелінде қайтыс болды.

Белгілі болғандай, шетелдік көлікті 42 жастағы Ақтау қаласының тұрғыны жүргізген. Полиция оның сау екенін айтты. Қазір ол уақытша ұстау изоляторында. Енді ол 5 жылдан 10 жылға дейін бас бостандығынан айрылуы мүмкін.