Анарбеков «Қайратты» Чемпиондар лигасының келесі кезеңіне алып шықты

29 шілде 2026 23:19 Перизат Жарылқасын

Фото: Orda.kz

Алматының Орталық стадионында УЕФА Чемпиондар лигасының екінші іріктеу кезеңі аясындағы қарымта матч аяқталды. «Қайрат» Кипрдің «Омония» клубымен тартысты ойын өткізіп, пенальти сериясында 6:5 есебімен жеңіске жетті, деп хабарлайды Orda.kz.

Кездесудің алғашқы минуттарында қос ұжым алма-кезек шабуыл ұйымдастырғанымен, 25-минутта қонақтар сапынан Андроникос Какулис «Қайрат» футболшысына қарсы дөрекі ойнағаны үшін алаңнан қуылды. Сан басымдығына ие болған алаң иелері шабуылды күшейтті. Бұған қоса, бас бапкер Рафаэль Оразбахты бірден екі шабуылшыны – Исмаил Бекболат пен Эдмилсонды алаңға шығарды.

Нәтижесінде 38-минутта бразилиялық легионер баспен соққы бағыттап, есеп ашты. Бірінші тайм 1:0 есебімен «Қайраттың» пайдасына аяқталды.

Үзілістен кейін алматылық клуб шабуыл қарқынын үдете түскенімен, «Омония» қорғанысы негізгі уақыттың соңына дейін сыр берген жоқ.

Осылайша, екі матчтың қорытындысы бойынша жалпы есеп теңесті (1:1). Себебі бұған дейін Кипрде өткен алғашқы ойында алаң иелері 1:0 есебімен басым түскен болатын.

Текетірес тағдыры қосымша берілген екі таймда шешілуі тиіс еді. Оның үстіне «Омония» сапынан тағы бір футболшы куылып, «Қайратта» екі ойыншының басымдығы болды. Соған қарамастан, кипрліктер қорғаныста бекем тұрып алды.

Жеңімпаз тек пенальти сериясында анықталды. Бұл сында алматылық клубтың бағы жанды: қақпашы Темірлан Анарбеков шешуші соққыны қайтарып, матчтың басты қаһарманына айналды.

@ordaqazaqs
Алматылық «Қайрат» Чемпиондар лигасының екінші іріктеу кезеңінің қарымта матчында кипрлік «Омонияны» пенальти сериясында қапы қалдырды. Кездесудің 25-минутында қонақтар сапынан Андроникос Какулис қызыл қағаз алып, алаңнан қуылды. Азшылықта қалған қарсыластың осал тұсын тапқан бразилиялық Эдмилсон 38-минутта баспен гол соғып, есеп ашты. Кипрдегі алғашқы кездесуде алаң иелері 1:0 есебімен жеңгендіктен, қос ойын қорытындысы теңесті. Экстра-таймда «Омония» қорғаушысы Сену Кулибали қызыл қағаз алды. «Қайрат» қарсыласынан екі ойыншыға артық болғанымен, кипрліктер қорғанысты берік ұстап, есеп өзгермеді. Жеңімпаз пенальти сериясында анықталды. Мұнда қақпашы Темірлан Анарбеков қатарынан екі соққыны шебер қайтарып, командасына жеңіс сыйлады (6:5). Енді «Қайрат» үшінші раундта «Левски» (Болгария) – «Университатя Крайова» (Румыния) жұбының жеңімпазымен кездеседі.
♬ түпнұсқа дыбыс – ORDA - ORDA

Пенальти сериясында екі соққыны қайтарған Темірлан Анарбеков өз командасын келесі айналымға алып шықты (6:5).

Енді «Қайрат» УЕФА Чемпиондар лигасының үшінші іріктеу кезеңінде «Левски» (Болгария) – «Университатя Крайова» (Румыния) жубының жеңімпазымен кездеседі. Ал ұтылған ұжым жарысты Европа лигасында жалғастырады.

Жаңалықтар

барлық жаңалықтар