Амстердамда көне түркі петроглифтерінің көрмесі ашылды

Түркі әлемінің көне петроглифтері Еуропа елдерінің бірінің астанасында зерттеуге қолжетімді болады.

Нидерланды астанасы тұрғындары «Петроглифтер. Таңба және көне түркі жазуы» көрмесінде көне түркі петроглифтері мен жазуының үздік үлгілерімен таныса алады, деп хабарлады Сыртқы істер министрлігі.

Көрме Қазақстан, Әзірбайжан және Түркияның Нидерланды Корольдігіндегі елшіліктері, сондай-ақ Юнус Эмре Түрік мәдениеті мен мұрасы қоры және Халықаралық түркі мәдениеті мен мұрасы қорының қолдауымен ұйымдастырылды.

Көрменің ашылуында Қазақстан Елшісі Асқар Жұмағалиев түркі әлемінің ынтымақтастығы мен бірлігінің маңыздылығын атап өтіп, мұндай шаралардың өзара сенім мен достықты нығайтудағы рөліне тоқталды. Сонымен қатар көрмеге келушілер үшін көне түркі жазуы бойынша шеберлік сыныбы ұйымдастырылды.