Американың ең беделді сахнасында Димаш Құдайбергеннің концерті өтті

АҚШ-тағы Madison Square Garden аренасы Димаш Құдайбергеннің концертін аншлагпен қарсы алды, деп хабарлайды Orda.kz.

Димаш Нью-Йорктегі Madison Square Garden сахнасында жеке концерт өткізген алғашқы қазақстандық әнші болды. Шоу 5 қазанда өтіп, зал толы көрермен жиналды. Бұл концерт оның «Stranger» атты әлемдік турының бастамасы саналды.

«Бұл тек менің жеке жетістігім емес, Еуразия мәдениеті үшін де маңызды белес. Біз әлемнің арғы бетінде мәдениет елшісі ретінде өнер көрсетіп жатырмыз», – деді Димаш концерт алдындағы сұхбатында.

Бағдарламада оның ең танымал шығармалары орындалды: SOS d’un terrien en détresse, авторлық The Story of One Sky, сондай-ақ Love’s Not Over Yet. Бұл туындының продюсері – «Грэмми» иегері Уолтер Афанасьефф. Әнші көрермендерді тек вокалдық шеберлігімен емес, жаңа музыкалық үнмен де таңғалдыруға тырысқанын атап өтті. Stranger композициясында қазақ қобызы мен виолончель үні қосылған Хаузердің партиясы қолданылды.

Madison Square Garden – әлемдегі ең беделді сахналардың бірі. Онда Майкл Джексон, Элвис Пресли, Бейонсе, Андреа Бочелли және Битлз сынды аңыз тұлғалар өнер көрсеткен. Димаш үшін бұл Нью-Йорктегі екінші ірі концерт: алғаш рет ол мұнда 2019 жылы Arnau туры аясында ән шырқаған.

«Алты жылдан кейін көрерменге жаңа әсер сыйлағым келеді. Дегенмен осы әндерде сағыныш сазы да бар – ол менімен бірге барлық сахнаға ілесіп жүреді», – деді әнші.

Нью-Йорктегі бұл кеш Димаштың 2022 жылы Алматыда басталған үлкен турының жалғасы. Содан бері бағдарламаға When I’ve Got You, Smoke, Fire сияқты жаңа туындылар, Сәкен Сейфуллиннің өлеңдеріне жазылған әндер мен халықаралық коллаборациялар енгізіліп келеді.

Айта кетейік, жуырда Димаш Құдайбергенге «Қырғызстанның халық әртісі» атағы берілді.