Америкалық отбасы асырап алған қазақ қызы өз-өзіне қол салды

АҚШ-та 26 жастағы Қазақстан тумасы қайтыс болды, оны кезінде америкалық отбасы асырап алған болатын, деп хабарлайды Orda.kz тілшісі.

Динараны америкалық отбасы 6 жасында асырап алған. Сол күні олар Қостанайдағы балалар үйінен тағы бір баланы асырап алып, екі кішкентай қазақстандық мұхиттың ар жағына аттанған еді.
Бірнеше жылдан кейін асыраушы ата-анасы ажырасып, жаңа отбасын құрады. Қыз жалғыз қалады.
Қазақстаннан шетелдіктер асырап алынған балаларға арналған бір телебағдарламада Динара асырап алған ата-анасының ажырасуы туралы айтқан болатын.

«Олардың жаңа өмір бастағанына өте қуаныштымын. Өмірлерін менсіз бастағанына еш ренжімеймін»,
– деді ол.

Қыз сондай-ақ Қостанайдағы балалар үйіндегі балалық шағы туралы әңгімелеп берді.

«Бізге адам ретінде емес, балалар үйінің тобырындай қарайтын. Бойым ұзын болғандықтан, тәрбиешілер мені сиыр деп атайтын. Бізді ағаш таяқшалармен ұратын, үтікпен күйдіретін, өте ыстық суға тұрғызатын, ауызымызға сабын тығып, қараңғы душқа қамап қоятын»,
– деп еске алды Динара. 

Сенбі, 6 қазан күні, қыздың өз-өзіне қол жұмсағаны белгілі болды. Бұл туралы «Шетелдегі қазақ балалары» жобасының авторы Жанар Байсемізова-Колесникова өзінің фейсбук парақшасында жазды.

«АҚШ-тан жеткен қаралы хабар жылы күздің күнін суытып жіберді. Бізді кешір, Динара. Жаның жәннатта болсын», — деп жазды Жанар Бейсемізова.

Динара жазумен, шығармашылықпен айналысқан болатын.