Америкалық журналист Украинадағы соғыстың аяқталуының үш сценарийін сипаттады

Америкалық журналист Томас Фридман The New York Times –тегі  мақаласында Украинадағы соғыстың аяқталуының үш сценарийін сипаттады.

Автордың айтуынша, бірінші, ең ауыр сценарий, Еуропа нацистік дәуірден бері көрмеген ауқымды әскери қылмыстар болуы  мүмкін. Сарапшы Батыс Владимир Путинді тоқтата алмаса, ол Украинаны жер бетінен жоқ қылуға дейін барады деп есептейді.

«Қазіргі жаһандану әлемі мұндай деңгейдегі соғыс қылмыстары үшін айыпталған, елі 11 уақыт белдеуін қамтитын, әлемдегі ең ірі мұнай мен газ жеткізушілерінің бірі болып отырған және ядролық оқтұмсықтардың ең үлкен арсеналына ие көшбасшымен ешқашан күресуге мәжбүр болған емес»  деп жазады Фридман.

Автор ықтималдығы төмен деп атаған екінші сценарий бойынша Ресейге қарсы экономикалық санкциялар күшіне еніп, екі тарап та ымыраға келуге мәжбүр болады.

«Атысты тоқтатуға және ресейлік әскерлерді шығаруға айырбас ретінде қазір де-факто Ресейдің бақылауындағы Украинаның шығыс анклавтары Ресейге ресми түрде беріледі, ал Украина ешқашан НАТО-ға кірмейтініне ашық уәде берді. АҚШ пен оның одақтастары Ресейге қарсы жақында енгізілген барлық экономикалық санкцияларды алып тастауға келіседі» деп болжайды сарапшы.

Фридманның айтуынша, бұл сценарий Путиннен Украинаның реинтеграциясына қатысты өз көзқарасына қол жеткізе алмағанын мойындауын талап етеді.

Америкалық журналистің пікірінше, ең екіталай сценарий – орыстар көтеріліп, ақырында Путиннің өзін құлатады.

«Мыңдаған адамдар қазірдің өзінде Путиннің ақылсыз соғысына наразылық білдіру үшін көшелерге шығып жатыр. Олар өз қауіпсіздігіне қауіп төндіруде. Және айту әлі ерте болса да, олардың кері реакциясы қорқыныш кедергісі болып жатқан жоқ па деген сұрақ туады. Егер бұқаралық қозғалыс ақыры Путин билігіне нүкте қоя алатын болса» деп жазды мақала авторы.