«Америка дауысы» радиостанциясы хабар таратуды тоқтатты

1,3 мыңнан астам қызметкер еңбек демалысына жіберілді, деп хабарлайды Orda.kz.

83 жылдан бері радиостанция алғаш рет хабар таратуын тоқтатты. Бұл туралы LinkedIn әлеуметтік желісінде редакция директоры Майкл Абрамовиц мәлімдеді.

«Мен аты аңызға айналған «Америка дауысының» 83 жылдан бері алғаш рет үнсіз қалғанына қатты қынжыламын. Бүгін таңертең мен бүкіл команданың дерлік – 1,3 мыңнан астам журналистер, продюсерлер мен көмекші қызметкерлердің әкімшілік демалысқа шыққанын білдім. Оның ішінде мен де бармын» деп жазды Абрамовиц.

«Америка дауысы», сондай-ақ «Азаттық радиосы» және «Азат Азия радиосын» қаржыландыруды Дональд Трамптың бұйрығымен осы БАҚ-тың бас агенттігі USAGM арқылы тоқтатты.

Бұған дейін АҚШ президенті бюрократиямен күресу үшін бірден бірнеше департамент міндеттерін қысқарту туралы жарлыққа қол қойған болатын. Тиісті құжат 14 наурызда Ақ үй сайтында жарияланды. Бұл тізімге АҚШ-тың Жаһандық БАҚ жөніндегі үкіметтік агенттігі де (USAGM) кірді.

Трамп өзінің бірінші мерзімінде USAGM-тің редакциялық шешімдерін сынға алғаны баршаға мәлім.

Бизнесмен, қазір Мемлекеттік тиімділік департаментінің кураторы Илон Маск бұған дейін бұл БАҚ-ты жабуға шақырған. Ол өз ұсынысын негіздей отырып, оларды «өзімен-өзі сөйлесетін ессіз солшыл радикалдармен» салыстырып, «жыл сайын америкалық салық төлеушілердің қалтасындағы миллиардтаған долларды босқа жағып тастайды» деп сипаттады.

Бұған дейін еліміздегі депутат Смирнова Қазақстан ұлттық мүддесін USAID сияқты ұйымдар қызметінен қорғауы қажет деп мәлімдеді. Үкімет басшысына жолдаған депутаттық сауалында мәжілісмен АҚШ талқылап жатқан USAID агенттігі, «Азаттық радосы» мен «Америка дауысы» радиоларын мысал етті.