Қамаудағы Қайрат Құдайберген депутаттық мандатынан айрылды

Қаңтар оқиғаларынан кейін қамауға алынған Қайрат Құдайберген Алматы мәслихатындағы депутаттық мандатынан айрылды.

– Мәслихатта мандаттарды қайта бөлу және М.А.Әділхановтың, Л.Е.Ибрагимованың, Е.З.Талбидиновтың, Қ.Қ.Сәрсенбайдың, А.А.Жүдебаевтың, М.М.Зулеевтің, Р.Ч.Бөлекбаеваның, А.Құрманбектің берген өтініштеріне сәйкес партиялық резервке енгізу жүргізілді. Сонымен қатар мына азаматтар партия құрамынан шығарылды: «AMANAT» партиясынан Қ.Құдайберген және «Қазақстан Халық партиясынан» А.Б.Әбілқасымова және А.Т.Шапенов (өз еркімен), – деп хабарлады Алматы қаласы әкімінің баспасөз қызметі.

Қайрат Құдайберген 2018 жылдың наурыз айынан бастап қалалық мәслихат депутаты болды.

Еске салайық, Алматы қалалық мәслихатының депутаты Қайрат Құдайберген қаңтар оқиғасынан кейін қамауға алынды. 22 сәуір күні таңертең Қайрат Құдайберген жаппай тәртіпсіздіктерді ұйымдастыруға және оған қатысуға күдікті ретіндде уақытша ұстау изоляторына жеткізілді. Қазір экс-депутат қамауда.