«Алтын сапа» және «Қазақстанның үздік тауары» байқаулары 2024 жылы болмайды

«Атамекен» Ұлттық кәсіпкерлер палатасы «Алтын сапа» және «Қазақстанның үздік тауары» байқауларын келесі жылға ауыстыратынын мәлімдеді. 

Палата Мемлекет басшысының су тасқынына байланысты имидждік және басқа да ірі іс-шаралардың күшін жою туралы тапсырмасын орындау және бюджет қаражатын үнемдеу мақсатында Қазақстан Республикасы Президентінің «Алтын сапа» сыйлығына конкурсы мен «Қазақстанның үздік тауары» республикалық байқау-көрмесін келесі жылға қалдырды.

Конкурс мемлекет өндірісін және тауарлар мен қызметтер сапасын үнемі жақсарту мақсатында Қазақстан Республикасы Президентінің 2006 жылғы 9 қазанда № 194 «Қазақстанның жаңа экономикасын құру, дамыту мақсатында Қазақстан Республикасы Президентінің «Алтын сапа» сыйлығын алуға конкурс өткізу туралы» Жарлығымен тағайындалған.

Қазақстан Республикасы Президентінің «Алтын сапа» сыйлығына конкурс заманауи менеджменттің даму тенденцияларын ескеретін және Еуропалық сапа сыйлығымен үйлестірілген үлгі бойынша өткізіледі. Сонымен қатар, критерийлер өнім мен қызмет сапасы саласындағы жетістіктер үшін ТМД сыйлығына сәйкес келеді.

«Конкурс менеджменттің жетекші рөлін, ұйымның сапа саласындағы саясаты мен стратегиясын, тұтынушылардың өнім мен қызмет сапасына қанағаттануын сипаттайтын көрсеткіштердің маңыздылығын күшейтеді, ұйымдардың сапалы жұмысын сынауға мүмкіншілік береді», - деп атап өтті Атамекен.

«Алтын сапа» байқауына жыл сайын елімізде 200-ге жуық кәсіпорын қатысады.