«Алтын белгі» төсбелгісін алу қиындады: емтихан жұмысын комиссия тексереді

«Алтын белгі» төсбелгісі үміткерлерін тексеру ережелері қатаңдатылды. Енді түлектердің емтихан жұмыстарын білім басқармалары жанындағы комиссиялар қарайды.

Бұл туралы Orda.kz Білім және ғылым министрлігінің баспасөз қызметіне сілтеме жасап хабарлады.

Жаңа ережеге сай, мектептер оқу озаттарының тізімін бұрынғыдай өздері жасамайды.

Білім басқармалары жанындағы комиссия үміткерлердің емтихан жұмыстарын тексеріп, нәтижелерін мектептерге жібереді. Артынан мектеп директорының бұйрығымен төсбелгі иегерлерінің тізімі бекітілетін болады.

– Бұрын мектеп пен білім бөлімдері үміткерлердің жұмысын өздері тексеріп, «Алтын белгіні» тапсыру туралы шешім қабылдайтын. Ал, қазір, кеңестік кезеңдегідей, емтихан жұмыстарын облыстық немесе Республикалық маңызы бар қаланың білім басқармасы жанындағы комиссия тексереді. Комиссия құрамына білікті, тәжірибелі пән мұғалімдері кіреді. Осыдан кейін ғана мектеп үздік оқушылардың тізімін бекітеді, - деді ҚР БҒМ мектепке дейінгі және орта білім комитетінің төрайымы Майра Мелдебекова.

2021 жылы мемлекеттік бітіру емтихандары 1-10 маусым аралығында өтеді. Жұмыстардың қорытындысы 12 маусымға дейін шығып, «Алтын белгі» иегерлерінің тізімі директор бұйрығымен бекітіледі.

Айта кетсек, 2020-2021 оқу жылында 3,4 млн астам оқушы мектептерде білім алды, 150 мыңға жуық түлек бар, оның ішінде «Алтын белгіге» 9 822 оқушы үміткер болып отыр.