Алты Қазақстан азаматы Газа секторынан эвакуацияланды

Гуманитарлық жағдайдың ушығуына байланысты Газа секторынан алты Қазақстан азаматы сәтті эвакуацияланғаны жөнінде ҚР Сыртқы істер министрлігі мәлімдеді, деп хабарлайды Orda.kz.

Оларды шекаралық бақылау бекеттері арқылы өткізіп, Амман әуежайына жеткізген. Сол жерден олар елге ұшып кетті. Эвакуация операциясы Қазақстанның Иордания мен Израильдегі елшіліктерінің қолдауымен ұйымдастырылды.

Министрлік Иордания мен Израиль билігінің қолдауы және Халықаралық Қызыл Крест комитетінің көмегі арқылы эвакуациялау мүмкін болғанын атап өтті.

Бұл арада Газа секторындағы жағдай әлі де күрделі күйінде қалып отыр. 8 тамызға қараған түні Израильдің әскери-саяси кабинеті палестиналық анклавтағы ең ірі қала — Газа қаласын бақылауға алу жоспарын бекітті.

Операция басталар алдында Израильдің Қорғаныс армиясы (ЦАХАЛ) Газа тұрғындары мен оған іргелес аймақтардың халқына сектордың оңтүстігіне эвакуациялану қажеттігі туралы ескерту жасайды. Ynet басылымының мәліметінше, бейбіт тұрғындар эвакуацияланғаннан кейін ЦАХАЛ қалаға қоршау жасап, ондағы ХАМАС содырларына берілуді ұсынады. Егер олар бас тартса, Израиль күштері шабуыл бастайтынын мәлімдеді.

«Өз қауіпсіздігімізді қамтамасыз ету үшін біз ХАМАС-ты жоюды, бейбіт тұрғындарды босатуды және Газаны ХАМАС мүшесі емес әрі Израильді жоюды көздемейтін азаматтық басқаруға беруді көздеп отырмыз», — деді Израиль премьер-министрі Биньямин Нетаньяху.