Алтай Көлгінов LRT құрылысын аяқтау жоспарда бар екенін айтты

Жемқорлық фактісі тіркелген LRT құрылысы туралы бүгін елордада сөз қозғалды. Нұр-Сұлтан қаласының әкімі Алтай Көлгінов құрылысты жалғастыруға банктердің бірі келісім бергенін айтты.

Бұл туралы Orda.kz хабарлайды.

Елорда мәслихатының кезектен тыс сессиясында LRT құрылысы мәселесі көтеріліп, аяқталмай қалған нысандардың қала мен әуежайға баратын жолдың көркін бұзып тұрғаны айтылды.

– LRT мәселесі біраздан бері талқыланып келеді. Оның проблемасы қайдан пайда болды? Біріншіден, екінші деңгейлі банк банкротқа ұшыраған кезде сол жерде қаражат бұғатталып қалды. Екіншіден, осы мәселеде заң бұзушылық болды. Үшіншіден, қазір ең негізгі мәселе – ол қаржыландыру. Бұл жобаға қомақты қаражат керек. Осыған дейін біршама жұмыстар атқарылғанын білесіздер, орнатылған инженерлік құрылыстар қаланың сәнін келтірмей тұрғаны рас. Бірақ басталған жұмыс аяқталуы керек, - дейді қала әкімі Көлгінов.

Алтай Көлгіновтың ақпараттарына сәйкес, қала әкмідігі бір жылдан астам уақыт бойы банктермен талқылау жұмыстарын жүргізген. Банктер тиісінше бұл жобаны мақұлдағысы келмеген.

– Бұл жобаны іске асыруға банктер қосылуға қауқарсыз болып тұр. Сондықтан министрлікпен бірге конкурс жарияладық. Қазіргі кезде тиісті банк өзінің келісімін беріп жатыр, оны алдағы уақытта қосымша хабарлаймыз. Яғни олар келісімшартқа қол қойғаннан кейін айтамыз. Жоспар – жобаны аяқтау. Қазір әуежай жақта бір шақырымнан астам балкалар орнатылды, - деді ол.

Біраз уақыт бұрын Алтай Көлгінов осы нысанның қазіргі құрылыс жұмысына бір миллиард керек екенін айтқан болатын.