Альпинистер қар көшкінінің астында қалды

Қырғызстанда үш алматылық және бір мәскеулік альпинист қар көшкінінің астында қалды, біреуі қаза тапты.

Бұл туралы төрт адамнан тұратын альпинистер тобының мүшесі Павел Балжанов әлеуметтік парақшасында жазды.

29 шілде 5050 м биіктікте, таңғы 8.15-те Хан Тәңірінің оңтүстік жағындағы «бөтелкеге» кіре берісте, төрт адамнан тұратын топ қар көшкіні астында қалған. Атап айтсақ, Борис Дедешко, Павел Блажнов, Марианна Петрова, Алексей Смирнов. Альпинист қар көшкіні астында 40 минуттан астам уақыт болғанын айтты.

«Біз базамен радио арқылы байланысқа шықтық, төрт жолсеріктен тұратын топ бізден 20 минут жоғарыда жүрді. Жігіттер бізді іздей бастады, іздеу шаралары ұзаққа созылды. Барлығы 3 метрлік көшкіннің астында 40 минуттан астам уақыт өткіздік. Алексей сол жерде қайтыс болды, шұңқырға жасырынып үлгермеді. Ол 1,5 метрге жетпеді, сірә, сөмкесін тастағысы келмеді», - деп қосты Блажнов әлеуметтік парақшасында.

Сондай-ақ, ол қайтыс болған альпинистің денесін қазу жұмыстары 2 тамызда басталатынын қосты.