Әлназарова медициналық апараттарды жалған зауыттан сатып алғанын мойындады

Денсаулық сақтау министрі Ақмарал Әлназарова қазақстандық жалған зауыттардан медициналық жабдықтар сатып алынғанын растады деп хабарлайды Orda.kz.

Министр Санжар Боқаевтың видеосына қатысты пікір білдіріп, ақпаратты растады және жағдайдан хабардар екенін айтты. Әлназарованың айтуынша, бұл жалған зауыттарға лицензиялар пандемия кезінде берілгендіктен, тексеру органдары зауытқа барып, оны өз көздерімен көріп, тексеріс жүргізе алмаған.

Видеода ол Алматыдағы көпқабатты тұрғын үйде орналасқан, 15 қазақстандық медициналық жабдық өндіретін зауыт жайлы айтқан болатын. Денсаулық сақтау министрлігінің берген рұқсаттарында бұл жерде маммография мен компьютерлік томография жабдықтары шығарылады деп көрсетілген. «СК-Фармация» сол жерден 400 миллион теңгеден астам сомаға медициналық жабдықтар сатып алды. Артынша бұл жабдықтардың Қытай мен Кореяда шығарылғаны анықталды.

«Біз түскен шағымдарды талдадық. Осы компанияға қатысты 3 ресми шағым түсті, 2 тексеріс жүргіздік. Бұл мәселемен Медициналық және фармацевтикалық қызметті бақылау жөніндегі аумақтық комитет айналысты. Нәтижесінде басқа өндірістік алаңда тіркелген 26 тіркеу куәлігін анықтадық. Денсаулық сақтау министрлігінің бұйрығымен өндіріс жұмысы тоқтатылды. Бірақ тіркеу куәліктері қайтарылды, сондықтан сіз айтып отырған жағдайды ішінара растаймыз. Министрлік тиісті шараларды қабылдады», – деді Әлназарова.

Маусым айындағы STADA Health Report 2024 зерттеуі Қазақстанның денсаулық сақтау жүйесіне халық сенімінің төмендегенін көрсетті.