Алматының Жетісу ауданында үш емхана мен дәрігерлік амбулатория ашылады

Маусым айында Алматының Кемел шағын ауданында ауысымына 200 келушіге арналған отбасылық дәрігерлік амбулатория пайдалануға беріледі.

Бұл туралы Алматы әкімі Ерболат Досаев Жетісу ауданының тұрғындарымен кездесуінде айтты.

Ол ауданда алғашқы медициналық-санитарлық көмек көрсететін мекемелердің жетіспеушілігіне тоқталды. Мәселені шешу үшін аудан әкімдігі емханаларға үш ғимарат сатып алды. Омаров көшесінде 200 келушіге, Нүсіпбеков көшесінде 300 адамға, Жұмысшылар поселкесінде 240 адамға арналған ғимарат бар.

«Биыл маусым айында Нүсіпбеков пен Омаров көшелеріндегі ғимараттарды күрделі жөндеуден өткізуге тендер жариялаймыз. Жөндеу жұмыстарын тамыз айында бастап, 2024 жылдың наурыз айында аяқтауды жоспарлап отырмыз. 2024 жылдың II тоқсанында пайдалануға беріледі. Жұмысшылар ауылындағы ғимаратты сатып алу туралы келісім жасалды. Емхананы жөндеу және жабдықтар сатып алғаннан кейін төртінші тоқсанда ашу жоспарлануда», – деді қала басшысы Досаев.