Алматының құрметті азаматы тізімінде кімдер бар?

Алматы әкімдігі «Алматы қаласының Құрметті азаматы» атағын алған жаңа тұлғалардың тізімін жариялады.

Марапатталған құрметті азаматтар қатарында:

• Талапқали Әбішұлы Ізмұхамбетов – мемлекет және қоғам қайраткері, медицина ғылымдарының кандидаты, Қазақстан Республикасының еңбек сіңірген қайраткері. Ұлттық медицина қауымдастығының құрметті мүшесі, КСРО денсаулық сақтау үздігі.

• Меруерт Қаратайқызы Өтекешева – белгілі кеңестік және қазақстандық кино және театр актрисасы, Қазақ КСР-нің еңбек сіңірген әртісі.

• Алтынбек Қоразбайұлы Қоразбаев – кеңестік және қазақ композиторы, әнші, ұстаз. Қазақ КСР-нің еңбек сіңірген өнер қайраткері. Қазақстанның халық әртісі.

• Асылы Әлиқызы Осман – белгілі қоғам қайраткері, Қазақстан халқы Ассамблеясының мүшесі. Ғалым, профессор. ҚР ҰҒА корреспондент мүшесі. Қазақстанның еңбек сіңірген қайраткері.

• Жүрсін Молдашұлы Ерманов – ақын, публицист. Қазақстанның еңбек сіңірген қайраткері.

• Зинаида Леонтьевна Федотова – мемлекет және саясат қайраткері, Қазақстан Республикасының еңбек сіңірген заңгері.

• Қайырлы Уатайұлы Жонқабаев – Ұлы Отан соғысының ардагері, Панфилов дивизиясының жауынгері.

• Орынша Қарабалина – ұстаз, тарихшы. Қазақстан Республикасының еңбек сіңірген қайраткері.

• Күпесбай Оразбайұлы Жампиісов – мемлекет және қоғам қайраткері, отставкадағы 1-дәрежелі капитан, әскери матрос.

• Любовь Владимировна Нысанбаевна – еңбек сіңірген сәулетші, Қазақстан қала құрылысшылары одағының президенті.

Марапатталғандарға құрметті атақпен қоса 1 миллион теңгенің ақшалай сертификаты табыс етілді.

Хабарланғандай, шараның ресми бөлігінің соңында қала әкімі «Сүйем сені, Алматы!» фестивалін тамашалады. Алматының мәдени-тарихи дәуірлеріне арналған – 1940 жылдан бүгінгі күнге дейін.

Қала тұрғындары мен қонақтары музыка, поэзия және декорация арқылы әр онкүндіктің атмосферасына бой алдырды. Өнерпаздар Шәмші Қалдаяқовтың шығармаларын, Дос-Мұқасанның әндерін орындап, театрландырылған көріністер де қойды.

Қала күнінің басты оқиғасы Тұңғыш Президент саябағында өткен дәстүрлі «Alma Fest» фестивалі болды. Ұйымдастырушылар тұрғындар үшін алма жәрмеңкесі, үлкен концерт және түрлі шаралар әзірледі. Фестивальдің негізгі алаңында келушілерге 30-дан астам түрлі сортты 100 тонна жергілікті алма ұсынылды.

Қала күні танымал отандық жұлдыздар мен A'Studio тобының қатысуымен «Алматы Аренада» «Сәлем, Алматы!» атты үлкен концертпен аяқталады.

Еске салайық, қала күніне арналған негізгі мерекелік шаралар 16 қыркүйекте басталды. Алматының барлық аудандарында және мегаполистің басты орындарында концерттік бағдарламалар өтті.